Mehman Hüseynovdan önəmli mesaj – Öldü var, döndü yoxdur!

Cəza müddətini başa vuraraq həbsdən yenicə azad olunmuş bloger Mehman Hüseynov bu gün öz evində mətbuat konfransı keçirib.

Tədbirdə jurnalistlərlə yanaşı, vəkillər, ABŞ və Avropa dövlətlərinin diplomatları iştirak ediblər.

Mehman Hüseynov mətbuat konfransını üzərində qətlə yetirilmiş jurnalistlərin, o cümlədən Elmar Hüseynov, Rafiq Tağı, Mehman Qələndərli, Rasim Əliyev və digərlərinin şəkilləri olan posterin qarşısında keçirməklə, öz mübarizə əzmini nümayiş etdirib və gələcək fəaliyyətinin anonsunu vermiş olub. Bunu cəmiyyətə verilmiş “öldü var, döndü yoxdur” mesajı kimi də qiymətləndirmək olar. 


“Turan”ın məlumatına görə, Mehman Hüseynov mətbuat konfransında cəzaçəkmə müəssisəsində ona qarşı törədilmiş təxribatın təfərrüatları haqda danışıb. Onun sözlərinə görə, yeni cinayət işini gözləyirdi, ancaq bu cür “çirkin” formada olacağını düşünmürdü. “Cəza müddətinin başa çatmasına iki ay qalmış məni koloniya əməkdaşını döyməkdə ittiham etdilər”, – bloger bildirib. Onun sözlərinə görə, əslində heç bir insident olmamışdı.

M.Hüseynovu karserə salıblar, prokurorluq nümayəndələri bildiriblər ki, ona qarşı yeni cinayət işi açılır və onu 7 ildən 12 ilədək həbs cəzası gözləyir.

“Bilirdim ki, əvvəllər də digər siyasi məhbuslara qarşı belə təxribatlar olub. Həbs müddəti başa çatmazdan öncə yeni ittihamlar irəli sürüblər və onları yenidən mühakimə ediblər. Odur ki, mən dərhal bildirdim ki, quru aclığa başlayıram. Ya ittiham götürüləcək, ya da öləcəyəm”, – M.Hüseynov deyib.

Aclıq dekabrın 26-da başlayıb. Dekabrın 30-da blogerin halı pisləşib və o, az qala huşunu itirib. “Bildirdilər ki, mənə məcbur yemək verəcəklər. Ancaq o vaxta qədər mənim aksiyam ilkin nəticəsini vermişdi. Ona görə də su qəbul etməklə aksiyanı davam etdrdim”, – bloger bildirib. Yanvarın 7-dək bu cür davam edib. Bundan sonra ancaq maye süd məhsulları qəbul edib.

Penitensiar Xidmətin onun adından yaydığı müraciətə toxunan bloger deyib ki, müraciətin birində Mehman bildirib ki, siyasi mühacirətdə olan qardaşının hərəkətinə görə məsuliyyət daşımır. “Biz eyni prinsipləri paylaşa bilərik, bir-birimizi müdafiə edə bilərik, ancaq hər kəs öz hərəkətinə görə məsuliyyət daşıyır”, – o deyib.

Prezident İlham Əliyevin adına olan ikinci müraciətə gəlincə, Mehmana təklif edilib ki, nəzarətçi ilə insident baş verdiyini yazsın, peşman olduğunu, barışmaq istədiyini bildirisn. “Mən belə müraciəti imzalamaqdan imtina etdim”, – bloger qeyd edib.

Sonda hazırlanan müraciətdə onun günahsız olduğu bildirilib və işə obyektiv baxılması xahiş edilib.

Bir qrup hökumətyönlü fəalın Mehmana baş çəkməsinə və blogerin şikayətinin olmaması barədə informasiyaya gəlincə, M.Hüseynov deyib ki, bu görüşdə o, ittihamın saxtalaşdırılmasından, onun və digər siyasi məhbusların azadlığa buraxılmasının vacibliyindən danışıb.

O qeyd edib ki, yeni cinayət işilə bağlı ittihamın onun üzərindən götürülməsi Azərbaycan xalqının, vətəndaş cəmiyyəti fəallarının, müxalifətin, etiraz aksiyaları və sosial şəbəkələrdə kampaniya iştirakçılarının fəal mövqeyi sayəsində mümkün olub.

Eyni zamanda o, dəstəyə görə beynəlxalq ictimaiyyətə, ABŞ Konqresi və Senatının üzvlərinə, Avropa Parlamentinə və digər qurumlara, o cümlədən Amnesty İnternational, Sərhədsiz Reportyorlar təşkilatlarına təşəkkürünü bildirib.

M.Hüseynov qeyd edib ki, bloger işini, jurnalistlərin və media hüquqların müdafiəsi ilə bağlı fəaliyyətini davam etdirəcək. O Azərbaycan hökumətini bütün siyasi məhbusları azad etməyə çağırıb.

“Mən siyasi məhbusların azad olunması, insan hüquqlarının müdafiə sahəsindəvə blogerlik fəaliyətimi davam etdirəcəm. Qarşıdan Novruz bayramı gəlir. Azərbaycan hökumətini bayramqabağı amnistiya aktı qəbul etməklə və ya digər bu kimi qərarlaral azad etnəyə çağırıram”, o qeyd edib.

* Mehman Hüseynov 2017-ci il martın 3-də polisə böhtan atmaq ittihamı ilə həbs olunub. Buna Nəsimi polisində işgəncələrə dair bəyanatı əsas olub.

Amnesty İnternational beynəlxaq hüquq-müdafiə təşkilatı onu “vicdan məhbusu” kimi tanıyıb. Dekabrın sonlarında blogerə qarşı koloniya əməkdaşını döyməsilə bağlı yeni ittiham irəli sürülüb. M.Hüseynov saxtalaşdırmaya etiraz olaraq quru aclıq elan edib. Yeni həbs təhlükəsi yerli ictimaiyyətin etirazına və xaricdə tənqidlərə səbəb olub. Avropa Parlamenti Azərbaycan hakimiyyətini blogeri və digər siyasi məhbusları azad etməyə çağırıb. Bundan sonra prokurorluq blogerə qarşı cinayət işinə xitam verib.