Rusiyanın turistlərlə dolu kruiz gəmisi Gürcüstandan qovuldu

“İşğalçılar rədd olsun!”,  “Abxaziya Gürcüstandır!”, “Ukraynadan əl çək!”

Bu şuarlar ötən gün Batumidə Rusiyalı turistlərin Gürcüstana kütləvi axınına etiraz edən yerli fəalların aksiyasında qaldırılıb.

Batumidə Rusiyadan kruiz laynerinin ölkəyə daxil olmasına etiraz olaraq keçirilən aksiyada polis 23 nəfəri saxlayıb. Bu barədə “Netqazet”ə Daxili İşlər Nazirliyindən məlumat verilib.

Qurumun mətbuat xidmətindən verilən məlumata görə, saxlanılan şəxslər İnzibati Xətalar Məcəlləsinin polisin tələbinə tabe olmamaq və xırda xuliqanlığı nəzərdə tutan 166 və 173-cü maddələri ilə ittiham olunurlar.

“Droa” partiyasının məlumatına görə, saxlanılanlar arasında partiyanın Batumi regional təşkilatının rəhbəri Qenri Dolidze də var. Bundan əlavə, “Lelo”nun üzvü İrakli Kupradzenin yaydığı videoda Ukrayna vətəndaşı olduğunu deyən gənc qadını polisin necə saxladığı göstərilir.

Vətəndaş fəalları və müxalif siyasi partiyanın nümayəndələri dünən gecə saatlarında, iyulun 30-da Rusiyanı [Soçi] tərk edən kruiz gəmisinə qarşı nümayişə başlayıblar. Bundan əvvəl məlum idi ki, gəmi iyulun 31-i səhər Batumiyə daxil olmalı idi.

Gecə boyu davam edən aksiya iyulun 31-də də davam edib. Aksiya iştirakçıları həmin yerə etiraz plakatları, eləcə də Gürcüstan, Ukrayna və Avropa İttifaqının bayraqları gətiriblər.

Səhər saat 10:20 radələrində avtobus və mikroavtobus taksiləri liman ərazisindən ayrılıb, bunun ardınca camaatın narazı qışqırıqları, həmçinin yumurta və butulkaların atılması müşahidə olunub. Adıçəkilən gəmidən gələnlər nəqliyyatda olublar.

Hadisə yerinə çoxlu sayda polis səfərbər olunub.
Hətta iyulun 30-na keçən gecə onlar limanın yaxınlığında qoşa bəndlər yerləşdiriblər ki, vətəndaşlar gəmiyə yaxınlaşa bilməsinlər.

Bu, son günlərdə ikinci dəfədir ki, Rusiyadan Batumiyə kruiz gəmisi gəlir. Bundan əvvəl, iyulun 27-də rusiyalı turistlərlə dolu başqa bir gəmi Batumi limanına daxil olub, sərnişinlərindən birinin Abxaziyaya səfər etdiyi iddia olunur – o Gürcüstanın işğal qanununu pozmuş ola bilər.

Yerli əhalinin etirazından sonra iyulun 27-də gələn gəmi Batumi limanını vaxtından əvvəl tərk edib. Hakim partiyanın sədri İrakli Kobaxidze vətəndaşın etirazını “vəhşilik” kimi qiymətləndirib, prezident Salome Zurabişvili isə mitinq iştirakçılarına dəstəyini bildirib.

Mənbə: Netgazeti