Qırğızıstan ilə Tacikistan arasında atəşkəs elan olundu – Yenilənib
Qırğızıstan və Tacikistan nümayəndələri sərhəddə yanvarın 27-də gərginləşən münaqişənin həlli ilə bağlı razılığa gəliblər. “Azadlıq” radiosunun Qırğızıstan xidməti xəbər verir ki, hər bir tərəf atəşi tamamilə dayandırmalı və ordunu geri çəkməlidir. Tərəflər atışma zamanı ölən və yaralananların rəsmi sayını da açıqlayıblar.
Tərəflər hər iki ölkənin hüquq-mühafizə orqanlarının iştirakı ilə sərhəddə patrul xidməti aparmaq barədə razılığa gəliblər.
Qırğızıstan prezidenti Sadır Japarov danışıqlar bitməzdən əvvəl münaqişənin sülh yolu ilə həllinə ümid etdiyini və vəziyyəti nəzarətdə saxladığını bildirib.
“İnşallah, hər şeyi danışıqlar yolu ilə, sülh yolu ilə həll edəcəyik. Narahat olmayın. Vəziyyəti gərginləşdirmək üçün ayrı-ayrı KİV və siyasətçilər tərəfindən yayılan yalan məlumatlara inanmayın”, – o, Facebook səhifəsində yazıb.
“Azadlıq” radiosunun Qırğızıstan xidməti xəbər verir ki, Qırğızıstan və Tacikistan sərhədində baş vermiş insident nəticəsində yanvarın 28-i səhər saatlarına olan məlumata görə, 11 Qırğızıstan vətəndaşı xəsarət alıb. Respublikanın Sərhəd Qoşunlarının məlumatına görə, Tacikistan tərəfdən isə münaqişə nəticəsində iki nəfər həlak olub. Atışmada ölənlərdən biri kənd sakini, digəri isə təcili yardım maşınının sürücüsü olub. Bundan başqa, 17 nəfər müxtəlif dərəcəli bədən xəsarətləri alıb.
***
Qırğızıstan-Tacikistan sərhədində atışma: ölən və yaralananlar var
Qırğızıstan və Tacikistan sərhədində Tort-Koço bölgəsində atışma olub. Bu barədə “Azadlıq” radiosunun Qırğızıstan xidməti Qırğızıstan Respublikası Milli Təhlükəsizlik Dövlət Komitəsinin Sərhəd Xidmətinin Batken vilayəti üzrə rəhbəri Kyalbek Tolonbayevə istinadən yazır.
Hər iki tərəfdən itkilərin olduğu bildirilir. Qırğızıstan Səhiyyə Nazirliyinin məlumatına görə, 4 qırğız hərbçisi yaralanıb, onlar Kok Taş kəndindən Batken regional xəstəxanasına aparılır.
Asia Plus mənbələrə istinadən yazır ki, 11 qurban xəstəxanaya çatdırılıb. Onlardan 3-ü mülki şəxs, 8-i isə Tacikistan hərbçisidir.
“Azadlıq” radiosunun tacik xidmətinin mənbələri 36 yaşlı Obidjon Tuyçiyevin öldüyü barədə xəbər yayıb.
Qırğızıstan Milli Təhlükəsizlik Dövlət Komitəsinin sərhəd xidməti bildirib ki, saat 17:30-dan 18:00-dək Tacikistan sərhədçiləri Batken vilayətinin Tort-Koç ərazisində Batken-İsfana yolunun bir hissəsini bağlayıblar. İki ölkə nümayəndələri arasında aparılan danışıqlardan sonra saat 19:30-dan etibarən yol açılıb. Agentlik bildirir ki, lakin saat 19:35 radələrində Tacikistan tərəfinin Batken vilayətinin Çir-Dobo ərazisində sərhəd bölmələrinə silah tətbiq etməsi və atəşə tutması nəticəsində vəziyyət daha da pisləşib.
Saat 20:30-da verilən məlumata görə, Qırğızıstan-Tacikistan sərhədində vəziyyət gərgin olaraq qalır. Onun sözlərinə görə, Qırğızıstan və Tacikistan Sərhəd Qoşunlarının bölmələri arasında əsas atışmalar Tort-Koço və Çir-Dobo ərazilərində gedir. Tacikistan tərəfinin minaatan və qumbaraatanlardan istifadə etdiyi bildirilir.
“Saat 23:50-də Qırğızıstan və Tacikistan hərbçiləri arasında atəş 10 dəqiqəyə kəsilib. Atəşkəsdən sonra Batken vilayətinin rəhbəri A.Alimbayevin Tacikistanın Suqd vilayətinin qubernatoru ilə görüşü planlaşdırılıb. Lakin Tacikistan tərəfi atəşkəs haqqında ikitərəfli razılaşmanı yenidən pozaraq Qırğızıstan hərbçilərinin mövqelərini atəşə tutmağa davam edib. Saat 00:20-yə olan məlumata görə, iki ölkənin hərbi qulluqçuları arasında toqquşmalar davam edir.
Tacikistan sərhəd xidməti iddia edir ki, ayrı-ayrı hərbiləşdirilmiş birləşmələr və bölmələr, eləcə də hərbi texnika Batken vilayətinin sərhədyanı ərazilərinə köçürülür.
Somonyen kəndinin sakinləri sərhəddə atışma barədə Asiya Plus-a məlumat veriblər. Mənbələrin məlumatına görə, kənddən qadın və uşaqlar təhlükəsiz yerə təxliyə edilib.
Qırğızıstanın Fövqəladə Hallar Nazirliyi sərhədyanı kəndlərdən sakinlərin təhlükəsiz əraziyə təxliyyəsinə başlandığını elan edib.
Basta
