Türkiyə və İsrail münasibətlərin dörd illik sərinləşməsindən sonra səfirlərini yenidən təyin edəcəklər

İki regional güc 2018-ci ildə ABŞ-ın Qüdsdə səfirliyinin açılmasına qarşı Qəzza sərhədində etirazlar zamanı İsrail qüvvələri tərəfindən 60 fələstinlinin öldürülməsindən sonra səfirlərini geri çağırmışdılar.

Lakin onlar potensial əməkdaşlıq üçün uzun müddətdir gərginləşmiş əlaqələri düzəltməyə çalışır.

İsrailin Baş naziri Yair Lapidin ofisinin çərşənbə günü bildirdiyinə görə, iki ölkə diplomatik əlaqələri tam bərpa etmək qərarına gəlib.

Lapidin ofisinin Baş nazirlə Türkiyə prezidenti Rəcəp Tayyib Ərdoğan arasında söhbətindən sonra verilən açıqlamasında “İki ölkə arasında münasibətlərin bir daha tam diplomatik əlaqələr səviyyəsinə yüksəldilməsi, səfirlərin və baş konsulların geri qaytarılması qərara alınıb” deyilib.

“Münasibətlərin modernləşməsi iki xalq arasında əlaqələrin dərinləşməsinə, iqtisadi, ticarət və mədəni əlaqələrin genişlənməsinə, regional sabitliyin möhkəmlənməsinə töhfə verəcək” – deyə, əlavə edilib.

Mart ayında İsrail Prezidenti İsaak Hersoqun Türkiyəyə səfəri və ardınca hər iki ölkənin xarici işlər nazirlərinin səfərləri on ildən çox davam edən gərginlikdən sonra münasibətlərin isinməsinə yardım edib.

Türkiyənin xarici işlər naziri Mövlud Çavuşoğlu səfirlərin təyin olunmasının əlaqələrin normallaşması istiqamətində atılan addımlardan biri olduğunu deyib.

“Belə bir müsbət addım edilən səylər nəticəsində İsraildən gəldi və Türkiyə olaraq biz də İsrailə, Tel-Əvivə səfir təyin etmək qərarına gəldik” Çavuşoğlu Ankarada keçirdiyi mətbuat konfransında deyib və Türkiyənin kimisə səfir seçdiyini bildirib.

İsrailin regional güclərlə əlaqələri yaxşılaşdırmağa çalışdığı bir vaxt atılan bu addım İsrail, Bəhreyn, Birləşmiş Ərəb Əmirlikləri və Mərakeş arasında münasibətlərin normallaşdığını göstərən “İbrahim Razılaşması”ndan iki il sonra atılıb.

Türkiyə 2020-ci ildə Misir, Birləşmiş Ərəb Əmirlikləri, İsrail və Səudiyyə Ərəbistanı ilə əlaqələri bərpa etmək üçün səylərə başladı. Qahirə ilə həmin səylərdə indiyədək az irəliləyiş olsa da, rəsmilər Ər-Riyad və Əbu-Dabi ilə münasibətlərdə normallaşma işlərinin yaxşı getdiyini bildirib.