Azərbaycanda 31 nəfərdə koronavirusun “Delta” ştammı aşkar edilib

Azərbaycanda koronavirusun “Delta” ştammı aşkarlanıb.

 

Bu haqda Azərbaycan Respublikasının Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi birgə açıqlama yayıb.

 

Açıqlamada deyilir:

 

“Bir ildən uzun müddətdir davam edən SARS-CoV-2 pandemiyası bütün dünyada mühüm səhiyyə problemi olmaqla birlikdə sosial və iqtisadi cəhətdən də ciddi çətinliklər yaratmaqdadır. SARS-CoV-2 infeksiyasına qarşı aparılan tədbirlər, peyvəndlənmənin təşkili və effektivliyinin öyrənilməsi baxımından ölkəmiz dünyada ön sıralardadır. Koronavirusların mutasiyaları nəticəsində son zamanlar meydana çıxan yeni variantlar bütün dünyada ciddi narahatlıq doğurur. Ölkəmizdə epidemioloji vəziyyətin nəzarətdə saxlanılması üçün görülən tədbirlər çərçivəsində Milli Hematologiya və Transfuziologiya Mərkəzinin Genetik Diaqnoz Mərkəzində SARS-CoV-2 virusunun genetik variantlarına dair mütəmadi analizlər aparılır.

 

Aparılan araşdırmaların növbəti mərhələsində son dövrdə ölkə xaricindən gələn şəxslərdən alınmış nümunələrdən 31-də B.1.617 (Delta) variantı, 9-da B.1.1.7 (20 Alpha V1, Britaniya) variantı aşkar olunub.

 

Dünyada və ölkəmizdə aparılan tədqiqatlardan əldə olunmuş nəticələrin təhlili bir daha göstərmişdir ki, virusun yeni və sürətlə yayılan təhlükəli variantlarından qorunmağın ən effektiv yolu vaksinasiyadır. Bu gün ölkəmizdəki sabit epidemioloji vəziyyət üçün aparılan vaksinasiyaya borcluyuq. Bir daha bütün vətəndaşlarımızı vaxt itirmədən vaksinasiya olunmağa çağırırıq.

 

Unutmamalıyıq ki, vaksinasiya ilə yanaşı, fiziki məsafənin saxlanılması, maskalardan istifadə və əl təmizliyi kimi qaydalar, virusun variantından asılı olmayaraq, xəstəlikdən qorunmağın, dünyada və ölkəmizdə normal həyata qayıtmağın yeganə yoludur.  Pandemiyanın sonunu görmək və gələcəyə sağlam addımlamaq üçün mütləq peyvənd olunaq!”

 

Azərbaycanda ötən gün ərzində koronavirus infeksiyasına 133 yeni yoluxma hadisəsi qeydə alınıb, 71 nəfər sağalıb, bir nəfər vəfat edib, bu barədə iyulun 13-də Nazirlər Kabineti yanında Operativ Qərargah məlumat yayıb.

 

Xəstəliyə yoluxanların ümumi sayı 337 456 nəfərə çatıb, onlardan 330 873 nəfər sağalıb, 4 988 nəfər vəfat edib, 1595 aktiv xəstənin müalicəsi davam etdirilir.

 

Son bir gün ərzində 9365 koronavirus testi aparılıb.

 

Gün ərzində ölkədə 50 784 nəfərə vaksin vurulub.

 

Birinci dəfə peyvənd olunanların sayı 19 371 nəfər, ikinci peyvəndini vurduranların sayı 31 413 nəfər təşkil edib.

 

Vaksinasiya olunanların ümumi sayı 4 159 298 nəfərə çatıb, onların 2 494 551 nəfəri birinci doza, 1 664 747 nəfəri ikinci doza peyvənd vurdurub.