“RAMİZ MEHDİYEV ZƏRƏRSİZLƏŞDİRİLMƏLİDİR!” – “Siyavuş Novruzov o toyda ermənilərin əhatəsində idi”
“Bütün dünya pandemiyanın yaratmış olduğu ağır vəziyyətin içindədir. Azərbaycan dövləti bu böyük bəladan az itki ilə çıxmaq üçün bütün imkanlarını səfərbər edib. Dövlət başçısı səviyyəsində bütün proseslər nəzarət altındadır. Xalqımız dövlətimizlə bərabər Nazirlər Kabineti yanında Operativ Qərargahın qoyduğu tələblərə uyğun olaraq virusa qarşı mübarizə aparır. Çox təəssüf edirəm ki, uzun müddət Azərbaycan Respublikasında kifayət qədər yüksək vəzifə daşıyan, bir çox məsələlərdə özünü həlledici şəxs qismində göstərən və qanunlardan kifayət qədər xəbəri olan Ramiz Mehdiyev Azərbaycan qanunlarına əməl etmədən, pandemiyanın yaratmış olduğu məhdudiyyətləri nəzərə almadan, Operativ Qərargahın qəbul etdiyi kütləvi tədbirlər, eyni zamanda toy məclislərinin keçirilməsi ilə bağlı qadağalara əhəmiyyət vermədən, həm də ictimai rəyi nəzərə almadan nəvəsinin toy mərasimini təşkil edib. Mən bunu pisləyirəm və tamamilə qəbuledilməz hesab edirəm”.
Bunları Teleqraf.com-a açıqlamasında deputat Fəzail Ağamalı deyib. Onun sözlərinə görə, Ramiz Mehdiyevin bu davranışı Azərbaycan dövlətinə, Azərbaycan qanunlarına meydan oxumaqdır: “Şübhəsiz ki, həlledici söz onundur. Onun razılığı olmadan bu toy mərasimi keçirilə bilməzdi. Onun razılığı olmadan toyda iştirak edən qonaqlar evinin kandarında belə görünə bilməzdi, bu işlərin təşkilatçısı odur. O, Azərbaycan qanunlarını təpiklər altına ataraq, Azərbaycan xalqını təhqir edərək, özünün hər kəsdən üstün mövqeyə malik olduğunu nümayiş etdirir. O bu gün elimizin məbədi hesab olunan Azərbaycan Milli Elmlər Akademiyasının (AMEA) prezidentidir. Bu vəzifənin daşıyıcısı olaraq sözün həqiqi mənasında alimlərə məxsus olan nəcibliyi, qanun və qaydalara ciddi şəkildə əməl etməyi, bütün cəmiyyətimiz tərəfindən hörmət bəslənilən ziyalılığı nəzərə almalı və bu adımı atmamalı idi. Bu keyfiyyətlər isə Ramiz Mehdiyevdə yoxdur. Düşünürəm ki, onun AMEA-nın prezidenti vəzifəsini daşımağa heç bir mənəvi haqqı yoxdur, bu vəzifədən uzaqlaşdırılmalıdır. Eyni zamanda çoxsaylı hökumət təltifləri var ki, bu təltiflərdən məhrum edilməlidir. Mən inanıram ki, dövlətimiz Ramiz Mehdiyevin atdığı bu addımları ciddi şəkildə tənbeh etməklə, onun haqqında ciddi tədbirlər həyata keçirəcəkdir. Bu, təkcə mənim yox, sosial şəbəkələrdə də görüldüyü kimi, bütün Azərbaycan xalqının istəyi və arzusudur”.
Deputat hesab edir ki, Ramiz Mehdiyev bu addımı ilə bir daha özünün Azərbaycan xalqı ilə bir olmadığını, mənəvi dəyərlərimizi təpiklər altına atdığını sübut etdi: “Necə ola bilər ki, on minlərlə vətəndaşımız evinə gəlin gətirmək, gəlin köçürmək üçün aylardır pandemiyanın tez bitməsini gözləyir, övladına xonça hazırlayanın xonçasını toz basıb, o toy edə bilmir. İstənilən halda övladına ad günü keçirmək, yaxud sünnət mərasimini keçirmək üçün pandemiya qanunlarını pozduğuna, yaxud dostları ilə hansısa kafedə əyləşdiklərinə görə onlar haqlı olaraq Azərbaycan qanunları çərçivəsində cəzalanırlar. Bəs Ramiz Mehdiyevin o insanlardan nəyi artıqdır? Heç nəyi. O demək deyil ki, onun külli miqdarda sərvəti var, uzun illər boyu Azərbaycan dövlətçiliyində post tutdu. O postu tutmaqla Azərbaycan xalqına, dövlətinə böyük problemlər yaradıb, xəyanətlər edib. Mənsub olduğu komandanın tapşırıqlarını yerinə yetirib. Bu gün bəlli oldu ki, toy mərasimini təşkil edən, gəlin köçürən sabiq deputat İlham Əliyev məhkəmənin hökmü ilə 15 sutkalıq cəzalandırılıb. Bu, çox düzgün yanaşmadır. Mənə elə gəlir ki, bu, kimliyindən asılı olmayaraq hər kəsin qanun qarşısında bərabər olduğunu nümayiş etdirən addımdır. Lakin bu, kifayət deyil. Ən vacib addımlardan biri uzun illərdən bəri Azərbaycan dövlətinin ayaqları altına basılmış mina olan Ramiz Mehdiyevin zərərsizləşdirilməsidir”.
Toy məclisində iştirak edən Bakı Dövlət Universitetinin sabiq rektoru Abel Məhərrəmov haqqında danışan Fəzail Ağamalı, onun bu davranışı ilə özünü gözdən saldığını bildirib: “Məndə olan məlumata görə, Ramiz Mehdiyev Abel Məhərrəmovun cəzalandırılmasında, onun rektorluqdan uzaqlaşdırılmasında çox ciddi, həlledici rol oynayıb. Bunu bilə-bilə Abel Məhərrəmovun həm də akademikə yaraşmayan yaltaq mövqe nümayiş etdirib, o cür çıxış etməsini gözləmirdim. Məlum oldu ki, o kifayət qədər şəxsiyyətinə hörmət edən adam deyil. Xalqın adından danışmaq kimi cəsarətli yükü öz üzərinə götürməsi ən böyük məsuliyyətsizlikdir. Mən Abel Məhərrəmovu hansı cəzanı gözlədiyini bilmirəm. Amma ən böyük cəza insanların onu tənbeh etməsi, onu görəndə üzünü çevirməsidir. Mənə elə gəlir ki, Abel Məhərrəmovda zərrə qədər özünə hörmət varsa, bu, ona mənəvi işgəncə verməlidir. Abel Məhərrəmov BDU-nun rektorluğu vəzifəsindən azad edildiyi zaman mənə suallar ünvanlayırdılar. Mən Abel Məhərrəmova təsəlli verəcək sözlər demişdim. Demişdim ki, hər bir insanın həyatında səhvlər olur, o səhvlərdən birini də Abel Məhərrəmov edib, cəzasını aldı. Onun ətrafında müzakirə aparmağa ehtiyac yoxdur, akademik, alimdir, uzun illər BDU-nun rektoru vəzifəsini icra edib. İndi təəssüf edirəm ki, Abel Məhərrəmov haqqında o ziyalıdır, alimdir sözlərini işlətməyə dilim gəlmir”.
Fəzail Ağamalı toy məclisində iştirak edən millət vəkili Siyavuş Novruzov haqqında da danışıb: “Siyavuş Novruzov millət vəkili olaraq karantin rejimi qaydalarını pozmamalı, toya dəvət olunsa da, getməli deyildi. Orada xanımı, Ombudsman Səbinə Əliyevanın iştirakı da birbaşa olaraq Siyavuş Novruzovun günahıdır. Aldığım məlumatlara görə, Siyavuş Novruzov Yeni Azərbaycan Partiyası tərəfindən cəzalandırılıb. Siyavuş Novruzovun orada iştirak etməsində məndə xüsusi olaraq təəccüb yaradan o oldu ki, o, hər zaman çıxışlarında ermənilərə qarşı nifrətini ortaya qoyurdu. Ancaq o toy mərasimində Siyavuş Novruzov başdan başa ermənilərin əhatəsində idi. Ramiz Mehdiyevin erməni həyat yoldaşı olan Kalinanın, Kalinanın qardaşı, Ramiz Mehdiyevin qaynı olan Levonun və onun erməni övladlarının əhatəsində Siyavuş Novruzov toy şənliyində iştirak edirdi, özünü çox rahat hiss edirdi. Bu baxımdan düşünürəm ki, Siyavuş Novruzov burada çox böyük günah işlətdi və dediklərinin əksinə davranışlarını ortaya qoydu”.
Azpolitika.info
