Kənan Basqal necə tutulduğunu açıqladı

Həbsindən 10 gündən artıq vaxt keçdikdən sonra vəkili AXCP sədrinin ictimai əsaslarla mühafizəçisi Kənan Basqal (Zeynalov) ilə görüşüb. Kənan Basqal şərlənərək tutulduğu bildirib və vəkili vasitəsilə ictimaiyyətə müraciət göndərib:

“Evdən çıxıb məscidə namaz qılmağa gedirdim. Evimizdən məscidə gedən yolun darısqal bir yerində, canlı-cüssəli bir nəfər qarşımı kəsdi və yaxamdan yapışaraq “məni niyə söyürsən?” deyib çəkişdirməyə başladı. Mən ona “sən kimsən, mən heç səni tanımıram” dedim və onun üzünə diqqətlə baxmaq üçün başımdan “kapşonkanı” çəkdim. Bu zaman yaxınlıqda 2 polisin hərəsinin bir tərəfdə dayandığını gördüm. Yaxamdan yapışan şəxs yenə də “hə da, sənsən, Kənansan, məni niyə söyürsən?” deyərək məni qaldırıb yerə vurdu. Elə bu zaman həmin polislər gəlib onun yox, mənim qolumdan yapışdılar, o isə özünü yerə yıxaraq “məni bıçaqla vurdu” deyib qışqırmağa başladı. Heç 5 dəqiqə keçməmiş, məni polis maşınına mindirərkən “Təcili yardım” maşını da gəldi. Demək ki, polislər kimi, o da hazır gözləyirmiş. Məni bir müddət polis maşınında gözlətdikdən sonra (görünür, hara aparmaqları barədə tapşırığı gözləyirdilər), Suraxanı rayon polisinə gətirdilər və guya kimisə bıcaqladığıma görə cinayət işi başlatdılar”.

AXCP sədri Əli Kərimli Kənan Basqalın heç bir cinayət etmədiyini, əksinə onun özünə qarşı planlaşdırılmış cinayət törədildiyini bildirib.