İntim görüntülərə görə axundu şantaj edənlər məhkəmə zalında həbs edildi
Qafqaz Müsəlmanları İdarəsinin (QMİ) Quba üzrə keçmiş nümayəndəsi axund Elnur Əfəndiyevi intim görüntülərlə şantaj edənlər – Nübar İsazadə və İftixar Ağayevin cinayət işi üzrə məhkəmə istintaqı yekunlaşıb.
“Kriminalqafqaz” xəbər verir ki, Bakı Ağır Cinayətlər Məhkəməsində hakim Mahmud Ağalarovun sədrliyi ilə keçirilən prosesdə hökm oxunub.
Nübar İsazadə və İftixar Ağayev Cinayət Məcəlləsinin 182.3.2 (külli miqdarda əmlak əldə etmək məqsədilə hədə-qorxu ilə tələb etmə) maddəsi ilə təqsirli biliniblər.
Hökmə əsasən, N.İsazadə 10 il, İ.Ağayev isə 11 il 6 ay müddətə azadlıqdan məhrum edilib. Hər iki şəxs məhkəmə zalında həbs olunublar. Təqsirləndirilən şəxslər cəzalarını ciddi rejimli cəzaçəkmə müəssisəsində çəkəcəklər.
Qeyd edək ki, ittihama əsasən, N.İsazadə işlədiyi elektronika mağazasının müdiri İ.Ağayevin köməyi ilə evinə kamera quraşdırıb və axundla intim görüntülərini qeydə alıb. Daha sonra N.İsazadə və İ.Ağayev həmin görüntüləri yaymaqla axundu hədələyərək ondan 75 min manat tələb edib.
