Azərbaycan Avropaya 20 milyard kubmetrə yaxın qaz satıb
İndiyə qədər Cənub Qaz Dəhlizi (SGC) kəmərinin tərkib hissəsi olan Trans Adriatik Boru Kəməri (TAP) vasitəsilə 19,4 milyard kubmetrdən çox təbii qaz ixrac edilib.
Bunu energetika naziri Pərviz Şahbazov “Twitter”də bildirib.
Xatırladaq ki, bu gün Azərbaycanın TAP vasitəsilə İtaliya, Yunanıstan və Bolqarıstana qaz ixracına başlamasından 2 il keçir. Hazırda qazın Avropanın cənubuna nəql olunduğu kəmərin ötürücülük qabiliyyəti ildə 12 milyard kubmetr qaz təşkil edir.
TAP-ın tikintisi 2020-ci ilin oktyabrında başa çatıb. TAP-ın ümumi uzunluğu 878 km-dir ki, bunun da 550 km-i Yunanıstanın şimal hissəsindən, 215 km-i Albaniya ərazisindən, 105 km-i Adriatik dənizinin dibi ilə, 8 km-i isə İtaliya ərazisindən keçir.
Azərbaycanın #TAP vasitəsilə Avropaya qaz ixracına başlamasından iki il ötür. Bu müddətdə Avropaya 19,4 mlrd.3-dən çox qaz tədarük olunub.
— Parviz Shahbazov (@ParvizShahbazov) December 31, 2022
