Gülə-gülə, Səbuhi
Naxçıvanda Mübariz Pənahov (Laba) Vasif Talıbova qarşı iki günlük qiyam qaldırarkən Azərbaycanın əksər redaksiyaları ora öz jurnalistlərini göndərmişdilər. Səbuhi Məmmədli də göndərilmişdi, amma getməmişdi. “Komandirovka” puluna gəşəng yeyib-içmişdi.
Ertəsi gün qəzetlərdə Laba olayı barədə çıxan çoxsaylı reportajların içində ən yaxşısı Səbuhinin reportajı olmuşdu. Sonradan üstü açılmışdı ki, Səbuhi Naxçıvana heç getməyib. O, bunu qətiyyən özünə dərd eləmədən gülə-gülə demişdi: “Sizə yaxşı reportaj lazım deyildi?!”… Hər məsələdə bu qədər istedadlı idi.
Mənim ilk məqaləm 1994-cü ildə “Muxalifət” qəzetində çıxıb. Üstündən hardasa 10 il keçəndən sonra bir gün bir süfrə arxasında Səbuhi gülə-gülə dedi ki, o yazının honorarını redaksiyadan alıb və mənə verməyib. Halbuki, o yazıya ümumiyyətlə honorar yazıldığından xəbərim yox idi. Başqa da belə hallar olub, gülə-gülə yola verib. Halal xoşu olsun.
Səbuhi ölkədə ən istedadlı jurnalistlərdən biri olduğunu hələ 1993-cü ildə “525”-in “Hayd park” rubrikası ilə sübuta yetirib. Sonrakı dövrdə ölkədə işləmədiyi qəzet qalmayıb. Arada bir müddət oldu ki, Nəşriyyatda tək canına 4-5 qəzet (!) buraxırdı…
Doğma dilimizdə oxuduğum ən maraqlı reportajı Səbuhi Məmmədli yazıb.
Doğma dilimizdə oxuduğum ən təsirli rekviyemi də Səbuhi Məmmədli yazıb. Bu qeydlər də ona rekviyem əvəzi olsun.
Gülə-gülə, Səbuhi.
Cavan gedən jurnalistlərin sırası bu gün bir az da genişləndi: İbrahim Bayandurlu , Elçin Səlcuq, Zabil Muqabiloqlu , Qadir İbrahimli , Səbuhi Məmmədli. Biri də namizəddi…
.
Sayğı və ehtiramla anacayıq…
.
Mustafa Hacıbəyıi
