Azər Qasımlının vəkili istintaqı darmadağın etdi

Bu gün, martın 4-də Bakı Ağır Cinayətlər Məhkəməsində müxalif siyasətçi Azər Qasımlının işi üzrə məhkəmə davam etdi.

Vəkil Rövşanə Rəhimli öz çıxışı ilə faktiki olaraq istintaqı darmadağın etdi. Faktlarla isbatladı ki, Azər Qasımlıya qarşı irəli sürülən ittihamı təsdiq edən bir dənə də sübut yoxdur.

Onun sözlərindən məlum oldu ki, məhkəmənin zərərçəkən kimi tanıdığı Qurbanəli Yusifov Azər Qasımlıya olan borcu qaytarmamaq üçün, onun müxalifətçi mövqeyini qabardaraq guya təhdidlə üzləşdiyi barədə DİN-ə şikayət edib. Hakimiyyət isə sərt tənqidçisi Azər Qasımlını susdurmaq üçün bu şikayətdən istifadə edib.

Məhkəmədə maraqlı replikalar oldu.

Vəkil Aqil Layıc “Yalançının yaddaşı olmaz” misalını xatırladaraq vurğuladı ki, “zərərçəkən” eyni epizod üzrə bir birinə zidd olan üç müxtəlif ifadə verib.

Qurbanəli Yusifov söylədi ki, Azər Qasımlı “düşdüyü zərərin geri qaytarılmasına razı olsaydı və məbləğ şişirtməsəydi, iş bu yerə çatmazdı”.

Azər Qasımlı isə öz replika hüququndan istifadə edərək , Yusifova sual verdi: “Hər dəfə deyirsən ki, borcun 45 min yox, 20 min dollar olub. Yaxşı, bu 20 mini niyə qaytarmadın, yaxud nə vaxt qaytaracaqsan?”

Bu gün Azər Qasımlının son söz deyəcəyi gözlənilirdi. Lakin hakim məhkəməni bir həftə təxirə saldı. Növbəti iclas 11 mart saat 16:00-da olacaq. Həmin gün hökm oxunacağı istisna deyil.

*Politoloq Azər Qasımlı 2024-cü ilin dekabrından həbsdədir. Ona qarşı Cinayət Məcəlləsinin 182.2.3-cü (hədə-qorxu ilə tələb etmə, zor tətbiq etmə ilə törədildikdə) maddəsi ilə ittiham irəli sürülüb. O, ittihamı qurama, siyasi sayır.