Şahmat üzrə Çempionlar Turunun dördüncü mərhələsinin birinci günündə beş tur oynanılıb.

 

Azərbaycan qrossmeysterləri Şəhriyar Məmmədyarovla Teymur Rəcəbov da mübarizəyə qoşulub. Şahmatçılarımız hərəyə beş matç keçirib.

 

İlk turda Ermənistanı tərk etsə də, hələ də bu ölkənin bayrağı altında çıxış edən Levon Aronyanla görüşən Şəhriyar turnirə qələbə ilə başlayıb. O, rəqibini qara fiqurlarla məğlub edib. Ardınca Daniil Dubov (Rusiya) və Hikaru Nakamura (ABŞ) ilə heç-heçə edən Məmmədyarov Yorden Van Forrest (Niderland) üzərində qələbə qazanıb. Məmmədyarov günün son qarşılaşmasında Maksim Vaşye-Laqrava (Fransa) uduzaraq günü 3 xalla tamamlayıb.

Rəcəbov da erməni rəqibi ilə prinsipial görüşə ilk gündə çıxıb. Startda Aniş Giri (Niderland), Daniil Pişo (Argentina) və Uesli So (ABŞ) ilə heç-heçələrı sıralayan şahmatçımız ağ fiqurlarla oynadığı Aronyanla da xalı yarı bölüb. Teymur günün son matçında Daniil Dubova (Rusiya) qalib gəlib.

 

İlk beş turdan sonra Aniş Giri 4 xalla yarışın lideridir. Şəhriyar 3 xalla 4-cü, eyni xala malik Teymur isə əlavə əmsallara görə 6-cıdır.

 

Qeyd edək ki, növbəti 5 turun oyunları martın 14-də keçiriləcək.

 

 

Oxu.az