Büdcə ilk oxunuşda yeniləndi

Milli Məclisin 5 avqust iclasında 2020-ci ilin dövlət büdcəsinə dəyişikliklər layihəsi ilk oxunuşda qəbul edilib. Novator.az bildirir ki, yeniliyə görə, dövlət büdcəsinin gəlirləri 24 milyard 124 milyon manata enir, xərcləri 27 milyard 492,2 milyon manata artırılır.

Dövlət büdcəsində bir barel neftin qiyməti 55 dollardan 35 dollara dəyişdirilib.

Qanuna əsasən, büdcə gəlirlərinin 12,2 milyard manatı Dövlət Neft Fondundan transfertin, 7,2 milyard manatı Dövlət Vergi Xidmətinin xətti ilə daxilolmaların, 3,8 milyard manatı Dövlət Gömrük Komitəsinin xətti ilə daxilolmaların, 804 milyon manatı büdcə təşkilatlarının büdcədənkənar daxilolmalarının, 100 milyon manatı sair gəlirlərin payına düşür.

Dövlət büdcəsi xərclərinin 65,6 faizi cari xərclərə, 28,1 faizi əsaslı xərclərə, 6,3 faizi dövlət borcuna və öhdəliklərinə xidmətə yönəldiləcək.

İcmal büdcənin tərkibinə daxil olan dövlət büdcədənkənar fondlarının və Naxçıvan Muxtar Respublikasının büdcələrində də dəyişikliklər var. Dövlət Neft Fondunun gəlirləri 7 milyard 342,6 milyon manat nəzərdə tutulur, xərcləri 12 milyard 410 milyon məbləğində rəsmiləşir.

Əmək və Əhalinin Sosial Müdafiəsi Nazirliyi yanında Dövlət Sosial Müdafiəsi Fondunun gəlirləri və xərcləri 4 milyard 784,7 milyon manat, işsizlikdən sığorta fondunun gəlirləri və xərcləri 151,2 milyon manat olur.

Naxçıvan Muxtar Respublikasının büdcəsinin gəlir və xərcləri 483,8 milyon manat məbləğinə çatdırılır.

Novator.az