Vaqner muzdlularının gələcəyi qeyri-müəyyəndir

Bazar günü Rusiya hökumət qoşunları Moskva küçələrindən geri çəkilib və digər şəhərləri işğal edən üsyankar muzdlu əsgərlər yoxa çıxıb. Lakin qısamüddətli üsyan prezident Vladimir Putini zəiflədib, eyni zamanda onun qüvvələri Ukraynada şiddətli əks-hücumla üzləşib.

Böhrana son qoyan razılaşmanın şərtlərinə görə, Vaqner qoşunlarına şənbə günü paytaxtda dayandırılmış yürüşdə başçılıq edən Yevgeni Priqojin Belarusa mühacirət edib, lakin mühakimə olunmayacaq.

Onun və qoşunlarının sonda nə olacağı bəlli deyil.

Belarus prezidenti Aleksandr Lukaşenkonun vasitəçiliyi ilə əldə olunan razılaşmanın bəzi təfərrüatları açıqlanıb və nə Priqojin, nə də Putindən xəbər var. Rusiyanın yüksək səviyyəli hərbi rəhbərləri də susur.

ABŞ Dövlət katibi Antoni Blinken həftəsonu baş verənləri “qeyri-adi” adlandıraraq, Putinin 16 ay əvvəl Ukraynanın paytaxtını ələ keçirməyə hazırlaşdığını və indi Moskvanı bir zamanlar himayədarının rəhbərlik etdiyi qüvvələrdən müdafiə etməli olduğunu xatırladıb.

“Onların hara getdiyini və ora nə vaxt çatdıqlarını söyləmək hələ tezdir, lakin əlbəttə ki, Putinə qarşıdakı həftələr və aylar ərzində cavab verməli olacağı hər cür yeni suallarımız var.”

24 saatlıq üsyanın açdığı çatların Ukraynadakı müharibə üçün nə demək olduğu hələ aydın deyil. Lakin bu, Rusiya uğrunda döyüşən ən yaxşı qüvvələrin döyüş meydanından çıxarılması ilə nəticələnib. Kremlin aylar ərzində Baxmutda yeganə quru qələbəsini əldə etməkdə öz effektivliyini göstərmiş Vaqner qoşunları Moskvaya yaxınlaşanda çeçen əsgərlər onları dayandırmaq üçün göndərilmişdi.

Vaqner qüvvələrinin böyük ölçüdə müqavimətsiz, sürətli irəliləməsi Rusiyanın təhlükəsizlik və hərbi qüvvələrindəki zəiflikləri də üzə çıxarıb. Muzdlu əsgərlərin bir neçə helikopter və hərbi rabitə təyyarəsini vurduğu bildirilir.

Müdafiə Nazirliyi məsələyə münasibət bildirməyib.

Ukraynalılar ümid edirdi ki, Rusiya daxili döyüşləri Rusiya qüvvələri tərəfindən ələ keçirilən ərazilərin geri alınması üçün əks-hücumun ilkin mərhələsində olan ordusu üçün imkanlar yarada bilər.

Ukrayna prezidenti Vladimir Zelenski bazar günü ABŞ prezidenti Co Baydenə telefon danışığında Rusiyada dayandırılan üsyanın “Putin rejiminin zəifliyini üzə çıxardığını” deyib.

Priqojin qüvvələri şənbə günü ildırım sürəti ilə Rusiyanın cənubundakı iki hərbi mərkəzi nəzarətə götürüb və geri çəkilməzdən əvvəl Moskvadan 200 kilometrdək yaxınlaşıb.

Putin qoşunları Ukraynada Rusiya qüvvələri ilə birlikdə döyüşən uzun müddət müttəfiqi olan Priqojini avtoritar rejiminə qarşı çıxdığına görə xain adlandırıb. Daha sonra Rusiya lideri Priqojinin mühakimə olunmayacağını bildirib və Belarus lideri Aleksandr Lukaşenkonun vasitəçiliyi ilə əldə edilən razılaşma əsasında Rusiyanın müttəfiqi olan qonşu Belarusa getməsinə icazə verib.

Bu arada Vaqner muzdlu qruplaşmasının rəhbəri Yevgeni Priqojin Rusiya hərbi rəhbərliyinə qarşı başlatdığı silahlı üsyanı dayandırdıqdan sonra bazar ertəsi ilk ictimai şərhini verib.

O, Telegram mesajlaşma proqramında yayımlanan 11 dəqiqəlik audio mesajında deyib: “Mövcud rejimi və qanuni yolla seçilmiş hökuməti devirmək məqsədimiz yox idi”.

Priqojin bunun əvəzinə Rusiya hərbçiləri tərəfindən Kremlə bağlı şəxsi döyüşçülərinə ölümcül hücumun səbəb olduğu hərəkətlərini “ədalət yürüşü” adlandırıb.

O, rus ordusunun Vaqner düşərgəsinə raketlər və daha sonra vertolyotlarla hücum etdiyini, 30-a yaxın əsgərini öldürdüyünü iddia edərək, “Biz yürüşümüzə ədalətsizliyə görə başladıq” deyib.

Rusiya düşərgəyə hücumu inkar edib.

Priqojin Vaqner qrupunun Rusiyada və hətta dünyada ən təsirli döyüş qüvvəsi olduğunu iddia edib. Onun sözlərinə görə, Vaqnerin Rusiyanın cənubundakı Rostov-na-Donu şəhərini qan tökülmədən ələ keçirə bilməsi və Moskvanın 200 kilometrliyinə silahlı konvoy göndərməsi onun döyüşçülərinin effektivliyinin sübutudur.

Amerikanın səsi