BNA və şəxsən Hikmət Babayev xalqdan üzr istəməlidir – Deputatdan SƏRT AÇIQLAMA

Məmurun “taksiyə ancaq varlılar minməlidir” açıqlamasına ictimai reaksiya YAP-da narahatlıq doğurdu

.

Bakı Nəqliyyat Agentliyinin (BNA) Hüquq şöbəsinin müdiri Hikmət Babayevin “taksi xidmətindən yalnız imkanlı adamlar istifadə etməlidir” deyərək, rezonans doğuran açıqlamasından sonra Azərbaycanda taksi və ictimai nəqliyyat vasitələrində qiymətlərin yaxın vaxtlarda bahalaşacağı barədə şayiələr yayılıb.

Dövlət rəsmisinin ölkədə faktiki olaraq sosial bərabərsizliyin gücləndirilməsinə yönələn bu çıxışı cəmiyyətdə hiddətlə qarşılanmaqda davam edir.

Deputatı Aydın Mirzəzadə  Media.Az-a açıqlamasında deyib ki, H. Babayev taksi qiymətlərinin aşağı olmasını bazar iqtisadiyyatı şəraitində ölkədə rəqabət mühitinin mövcudluğundan xəbər verdiyini başa düşmür.

“Bu o deməkdir ki, sözügedən sahə inhisara alınmayıb, yəni taksi xidmətinin qiyməti vahid ola bilməz. Bu gün taksi xidmətinin demək olar ki, əhalinin bütün təbəqələri üçün əlçatan olmasına sevinmək əvəzinə, H. Babayev belə qəbuledilməz bir açıqlama verir. Bu açıqlama elə bir vaxtı verilir ki, koronavirus pandemiyası şəraitində həftə sonları ictimai nəqliyyatın hərəkəti dayandırılır, Bakı Metropoliteni isə hələ də bağlıdır”, deyə A. Mirzəzadə vurğulayıb.

Millət vəkilinin sözlərinə görə, deyəsən Hikmət Babayevin öz səhvini anlamayıb. O, üzr istəmək əvəzinə sadəcə sosial media profilini bağlamaqla kifayətlənib.

“Diqqətəlayiq haldır ki, Bakı Nəqliyyat Agentliyi də öz əməkdaşının şübhəli ifadələrini pisləyən açıqlama ilə çıxış etməyib. Xalqın əhval-ruhiyyəsi həmişə nəzərə alınmalıdır. Ümid edirəm ki, əgər BNA-nın ölkədəki taksi xidmətlərinin qiymətlərinin yüksəlməsinə dair arzusu var idisə, indi onlar öz təkliflərinə yenidən nəzər salacaqlar. Milli Məclisin ilk iclasında mən də daxil olmaqla bir çox deputat bu yanaşmaya qarşı çıxacaq. Bakı Nəqliyyat Agentliyi və Hikmət Babayev xalqdan üzr istəməlidirlər, insanlara belə münasibət bəsləmək olmaz. Xalqı varlı və yoxsula bölmək olmaz ”deyə A. Mirzəzadə söyləyib.

Millət vəkilinin sözlərinə görə, Bakı Nəqliyyat Agentliyi bu gün ilk növbədə günün sıx vaxtlarda avtobus çatışmazlığı problemi ilə məşğul olmalıdır:

“Əgər kifayət qədər nəqliyyat vasitəsi yoxdursa, günün müəyyən saatlarında özəl kommersiya şirkətlərinin avtobuslarını, misal üçün, xarici qonaqlara xidmət göstərən avtobusları bu işə cəlb etmək olar. BNA avtobuslarla əlaqədar problemləri həll etmədən anlaşılmaz bəyanatlarla çıxış edir. Agentlik məsələnin texniki tərəfinə və sürücülərin peşəkarlığına nəzarət etmək hüququnu özündə saxlamalıdır. Bəzən sifarişə gələn taksi avtomobilinin hansı acınacaqlı durumda olduğunun şahidi olursan. Bir daha qeyd etmək istərdim – belə çətin zamanda insanları qıcıqlandırmaq olmaz!”, – deyə, A. Mirzəzadə fikrini tamamlayıb.