Şuşada kütləvi məzarlıq aşkar edildi

Şuşa həbsxanası yaxınlığında qazıntılar zamanı kütləvi məzarlıq aşkar edilib, bu barədə bu gün Hərbi Əsirlərin, İtkin Düşmüşlərin və Girov Götürülmüş Şəxslərin İşləri üzrə Dövlət Komissiyasının işçi qrupunun rəhbər müavini Eldar Səmədov bildirib.

Xüsusən, 3-4 insan skeleti parçaları aşkar edilib, qazıntılar davam etdiriləcək.

Dövlət Komissiyasında Şuşada ermənilərin Birinci Qarabağ müharibəsi zamanı əsir götürdüyü Azərbaycan vətəndaşlarının meyitlərinin dəfn edildiyi bir neçə məzarlıq olduğu haqqında məlumat var.

“Şəhərin işğalı zamanı (1992-ci ilin mayında) əsir və girov götürülmüş Azərbaycan vətəndaşları burada qeyri-insani şəraitdə saxlanılıb. Onlara qarşı çoxsaylı cinayətlər törədilib, beynəlxalq humanitar hüquq pozulub. Bizdə olan məlumata görə, işğal zamanı burada (Şuşa həbsxanasında) 360 azərbaycanlı əsir və girov saxlanılıb. Onlardan 216-sı dövlət komissiyası tərəfindən aparılan danışıqlar nəticəsində azad edilib. Amma digərlərinin aqibəti hələ də məlum deyil. Hesab edirik ki, aşkar edilən meyitlər axtarışını apardığımız şəxslərə aiddir”, deyə Səmədov bildirib.

İkinci Qarabağ müharibəsindən sonra Şuşa rayonunun Daşaltı kəndi yaxınlığında, Kəlbəcərdə, Xocalı rayonunda Fərrux dağında, Xocavənd rayonun Edilli kəndində azərbaycanlıların kütləvi dəfn olunduğu qəbirstanlıqlar aşkar edilib.

Azərbaycanın İnsan Hüquqları üzrə Müvəkkili (Ombudsman) Şuşada aşkarlanan kütləvi məzarlıqla bağlı bəyanat yayıb.

Modern.az-ın məlumatına görə, Ombudsman Səbinə Əliyevanın adından yayılan bəyanatda deyilir:

“Azərbaycanın azad edilmiş ərazilərində Ermənistan işğalı dövründə insanların qətlə yetirilməsi və kütləvi şəkildə dəfn edilməsini sübut edən daha bir kütləvi məzarlıq bu gün Şuşa şəhərində aşkarlanıb. İlkin məlumatlara əsasən, həmin məzarlıqda ən azı dörd nəfərin qalıqları tapılıb.

Xüsusi diqqət çəkən məqamlardan biri budur ki, kütləvi məzarlıq Şuşa həbsxanası ərazisində aşkarlanmışdır. Bu fakt qanunsuz olaraq Şuşa həbsxanasında saxlanılmış azərbaycanlıların həmin həbsxanada dəhşətli işgəncələrə, qeyri-insani rəftara məruz qalması ilə bağlı səsləndirilmiş iddiaları və şahid ifadələrini bir daha təsdiq etmiş oldu.

Təəssüf hissi ilə bildiririk ki, Ermənistanın beynəlxalq humanitar hüququn tələblərini pozmaqla törətdiyi cinayətlərə dair faktların sayı bununla məhdurlaşmır. Belə ki, işğaldan azad edilmiş ərazilərimizdə daha öncə aşkarlanmış kütləvi dəfn yerləri ilə bağlı da Ombudsman tərəfindən dünya ictimaiyyətinə müraciətlər ünvanlanmış, Xocavənd rayonunun Edilli kəndində tapılmış məzarlıqlarda aparılmış yerində araşdırmaların nəticələrinə dair ayrıca hesabat hazırlanıb.

Azad olunmuş ərazilərimizdə davamlı olaraq kütləvi məzarlıqların aşkar edilməsi Ermənistanın azərbaycanlılara qarşı həyata keçirdiyi soyqırımı və etnik təmizləmə siyasətini bir daha sübut edir. Eyni zamanda, vurğulamaq istərdik ki, Ermənistanın Birinci Qarabağ müharibəsi dövründə itkin düşmüş dörd minə yaxın azərbaycanlının taleyi barədə hər hansı məlumat verməməsi uzun illərdir həmin şəxslərin ailə üzvlərinin dərin iztirab çəkməsinə səbəb olmaqdadır. Ermənistan tərəfi bu məsələdə də öz məsuliyyətindən boyun qaçıraraq kütləvi dəfn yerləri barədə məlumatların təqdim edilməsindən yayınıb.

Azərbaycan Ombudsmanı olaraq, bir daha dünya ictimaiyyətini beynəlxalq hüquq normalarının, insan hüquq və azadlıqlarının kobudcasına pozulmasını sübut edən bu kimi hallarla bağlı Ermənistana qarşı zəruri tədbirlər görməyə və itkin düşmüş soydaşlarımızın taleyi barədə məlumatların əldə edilməsi ilə əlaqədar dəstək verməyə çağırıram”.