NİDA Gənclər Hərəkatının fəalı saxlanıldı

Elmir Abbasova 20 sutka həbs cəzası verilib.

***

İyunun 22-də axşam NİDA Gənclər Hərəkatının fəalı Elmir Abbasov saxlanılıb.

“Elmirin doğmalarının məlumatına görə, dünən axşam saat 22:00-a yaxın o, anasına zəng edib deyib ki, evə gəlir, marketdən bir şey almaq lazımdırmı? Ancaq evə gəlməyib və onunla əlaqə kəsilib. Bu gün məlum olub ki, Elmiri saxlayıblar “, – Hərəkatdan Turan-a bildiriblər.

Azərbaycan Daxili İşlər Nazirliyinin mətbuat xidmətində Abbasovun saxlanılmasını Turan-a təsdiqləyiblər.

“Elmir Abbasov ictimai asayişin pozulması ilə əlaqədar saxlanılıb, araşdırma aparılır”, – nazirlikdən bildiriblər.

Lakin onun tərəfdaşları hesab edirlər ki, Abbasov Facebook-da polisi sərt tənqid etdiyinə görə saxlanılıb.

“Elmir dərc etdiyi statusda iyunun 20-də etiraz aksiyası zamanı Gədəbəy rayonunun Söyüdlü kənd sakinlərinə qarşı polis zorakılığını kəskin tənqid edib”, – Hərəkat nümayəndəsi deyib.

Elmir Abbasov bundan əvvəl də həbs edilib. 2021-ci ilin fevralında narkotik maddələrdən qanunsuz istifadə ittihamı ilə 30 sutka həbs edilib. O zaman müxalifətçilər onun həbsini hakimiyyətin tənqidilə əlaqələndirmişdilər.