Qubad İbadoğlunun barəsində 4 aylıq həbs qətimkan tədbiri seçildi
Nərimanov Rayon Məhkəməsində ADR partiyasının sədri Qubad İbadoğlu barəsində 4 ay həbs qətimkan tədbiri seçilib.
O, “Külli miqdarda saxta pul hazırlama, əldə etmə və ya satma” maddələri ilə ittiham olunur. Onu 8 ildən 12 ilə qədər həbs gözləyir. İqtisadçı həbsinin İlham Əliyevin sifarişi ilə olduğunu bildirib.
***
İstintaq müxalifətyönlü siyasətçi Qubad İbadoğluna qarşı Azərbaycan Cinayət Məcəlləsinin 204.1-ci (satış məqsədilə istehsal, habelə saxta pul və ya xarici valyutanın alınması və ya satılması) maddəsilə irəli sürülmüş ittihamı 204.3.1-ci maddəyə (eyni hərəkətlər mütəşəkkil qrup tərəfindən törədildikdə) tövsif edərək ağırlaşdırıb.
İstintaq orqanı İbadoğlunun barəsində həbs qətimkan tədbirinin seçilməsi üçün Nərimanov Rayon Məhkəməsinə təqdimat verib, vəkil Zibeydə Sadıqova bildirib.
Yaxın saatlarda məhkəmə təqdimata baxacaq.
Əgər 204.1–ci maddə üzrə İbadoğlunu 5 ildən 7 ilədək azadlıqdan məhrum olunma təhlükəsi gözləyirdisə, 204.3.1-ci maddə üzrə 8 ildən 12 ilədək azadlıqdan məhrum olunma təhlükəsi gözləyir.
***
Qubad İbadoğlunu Cinayət Məcəlləsinin 204.1-ci maddəsi (Saxta pul və ya qiymətli kağızlar hazırlama, əldə etmə və ya satma, beş ildən yeddi ilədək müddətə azadlıqdan məhrum etmə ilə cəzalandırılır) ilə şübhəli şəxs qismində saxlanılıb.
“Turan”ın məlumatına görə, bu barədə siyasətçinin qızı bildirib.
«Onu hal-hazırda «bandotdelin» zirzəmisində saxlayırlar. Ona dərman və paltar kimi ehtiyacları götürməyə imkan verməyiblər. Hələ də özünə lazım olan dərmanları yoxdur. Atamın yüksək təzyiq və şəkəri var, dərmanlar onun həm də digər daxili orqanları üçündü. Həmin dərmanlarsız o sadəcə məhv ola bilər», – daha sonra Bayramova bildirib.
Vəkil Zibeydə Sadıqova Qubad İbadoğlunun 204-cü maddə ilə şübhəli şəxs qismində istintaqa cəlb edildiyini təsdiqləyib.
***
