Sərhəddə lokal döyüşlər: İki hərbçimiz yaralanıb

Ermənistan silahlı qüvvələrinin bölmələri Ermənistan-Azərbaycan dövlət sərhədinin Kəlbəcər rayonu sahəsində təxribat törətməyə davam edir.

 

Müdafiə Nazirliyinin mətbuat xidmətindən  verilən məlumata görə, шyulun 28-i saat 00:50 radələrindən başlayaraq Ermənistan silahlı qüvvələrinin bölmələri Basarkeçər rayonu ərazisindəki müxtəlif istiqamətlərdə yerləşən döyüş mövqelərindən Azərbaycan Ordusunun Kəlbəcər rayonu ərazisindəki mövqelərini atıcı silahlar və qumbaraatanlardan növbəti dəfə intensiv atəşə tutub.

 

Qarşı tərəfdən açılan atəş nəticəsində iki hərbi qulluqçumuz – Əliyev Sadiq Nizami oğlu və İmranlı İmran Dilqəm oğlu yaralanıb. Yaralılara ilkin tibbi yardım göstərilib, onların həyatları üçün təhlükə yoxdur.

 

Azərbaycan Ordusunun bu istiqamətdə yerləşən bölmələri tərəfindən adekvat cavab tədbirləri görülür.

 

“Bir daha qeyd edirik ki, iki ölkənin dövlət sərhədi boyunca gərginliyin artırılmasına görə bütün məsuliyyət tam şəkildə Ermənistanın üzərinə düşür”, – deyə nazirlikdən bildirilib.

 

Erməmistanın Müdafiə Nazirliyi də gecə ərzində lokal döyüşlərin getdiyini və hər iki tərəfdən itkilər olduğu barədə məlumat yayıb. Məlumatda bildirilir ki, Ermənistanın iki hərbçisi yaralanıb, “daha beş nəfərin taleyi dəqiqləşdirilir”.

 

Ermənistan Müdafiə Nazirliyi daha sonra üç hərbçinin həlak olduğu, ikisinin yaralandığı barədə məlumat yayıb.