Ermənistan prokurorluğu Azərbaycan əsgərini qətldə ittiham edir
Ermənistan Baş Prokurorluğunun aprelin 18-də yaydığı məlumatda deyilir ki, Azərbaycan vətəndaşı Hüseyn Axundov üstündə olan avtomat silahla Zəngəzur Mis-Molibden Kombinatının gözətçisinə atəş açıb və Ermənistan vətəndaşı hadisə yerində keçinib.
AzadlıqRadiosunun Erməni xidməti – Azatutyun yazır ki, bundan əvvəl Hüseyn Axundovun Ermənistan ərazisində saxlanmış iki azərbaycanlı əsgərdən biri olduğu xəbər verilmişdi.
Ermənistan Baş Prokurorluğunun məlumatında deyilir ki, Hüseyn Axundov aprelin 12-də Qafanda yerləşən mis-molibden kombinatına gəlib və “mühafizə əməkdaşlarından birini onun mobil telefonunu və avtomobilini oğurlamaq məqsədilə qətlə yetirib”.
Məlumatda bildirilir ki, “Axundovun məqsədi İran ərazisinə keçmək olub”:
“Daha sonra Axundov ölənin mobil telefonunu, siqaretini və alışqanını götürüb və avtomobili işə salmağa çalışıb, bunu edə bilməyəndə isə hadisə yerindən qaçıb”.
Ermənistan Baş Prokurorluğunun məlumatında iddia olunur ki, Axundov daha sonra mobil telefonda müraciət videosu çəkib. Məlumatda bildirlir ki, Axundov həmin videoda deyib:
“Allaha şükür, Ermənistana çatdıq, 400-500 erməninin başını kəsdik, biz satqın deyilik və Azərbaycana qayıdacağımıza ümid edirik”.
Rəsmi məlumata görə Axundov bundan sora Sünik vilayətinin Açaçan kəndi istiqamətində gedib və aprelin 13-də təsadüfən qarşılaşdığı sakinlər tərəfindən zərərsizləşdirilərək hüquq-mühafizə orqanlarına verilib.
“Milli nifrət motivi ilə”
Azatutyun yazır ki, Ermənistan Baş Prokurorluğu aprelin 17-də Ermənistan ərazisinə daxil olmuş Azərbaycan vətəndaşları – Aqşin Bəbirov və Hüseyn Axundov barəsində cinayət işinin açıldığını xəbər vermişdi. Onların sərhədi qanunsuz keçməkdə ittiham edildikləri bildirilirdi.
Lakin aprelin 18-də Ermənistan prokurorluğu bildirib ki, Hüseyn Axundov barəsində ittiham dəyişdirilib və ona qarşı yeni ittiham irəli sürülüb.
Məlumatda deyilir ki, indi Axundov sərhədi qanunsuz keçməkdə, sərhəddən qanunsuz silah keçirməkdə və başqa bir şəxsi qətlə yetirməkdə ittiham olunur.
Məlumatda “cinayətin milli nifrət, dözümsüzlük və düşmənçilik motivi” ilə törədildiyi qeyd olunur.
Azərbaycan hərbçisi Hüseyn Axundova qarşı yeni ittihamla bağlı Azərbaycan tərəfinin və onun özünün münasibəti hələ ki, məlum deyil.
