Tofiq Yaqublunun barəsində 4 aylıq həbs qətimkan tədbiri seçilib

Cümə günü Nərimanov Rayon Məhkəməsi Müsavat Partiyasının və Demokratik Qüvvələrin Milli Şurasının Koordinasiya Mərkəzinin üzvü Tofiq Yaqublunu 4 ay müddətinə həbs edib.

Vəkil Nemət Kərimli jurnalistlərə bildirib ki, istintaq vəsatəti onunla əsaslandırıb ki, Yaqublu azadlıqda olarsa, “istintaqa mane ola və gizlənə bilər”.

Müdafiə tərəfi bu iddiaların əsassız olduğunu bildirib. Vəkil məhkəmənin diqqətinə ona yönəldib ki, hazırda Yaqublu şərti cəza çəkir və bu müddətdə cəzanın tələblərinə düzgün əməl edib.

***

Tofiq Yaqublu Azərbaycan Cinayət Məcəlləsinin 178.3.2 (külli miqdarda ziyan vurmaqla dələduzluq etmə), 320.1 (rəsmi sənədləri saxtalaşdırma) və 320.2-ci (bilərəkdən saxta sənədlərdən istifadə etmə) maddələri ilə  Nərimanov rayon polis idarəsində başlanmış cinayət işi üzrə şübhəli şəxs qismində cəlb edilib. Bu barədə vəkil Aqil Layıc məlumat verib.

Cinayət işi faktla bağlı açılıb,  hələlik işdə təqsirləndirilən şəxs yoxdur,  deyə vəkil aydınlıq gətirib.

O əlavə edib ki, istintaq hərəkətləri dekabrın 15-i səhər saatlarından davam etdiriləcək.

Cinayət işinin məzmununu şərh  etməyərək Layıc, “bu,  bir növ”mühacir alverinə bənzər bir şeydir” deyə söyləyib. (Əvvəllər Azərbaycan prokurorluğu Avropada siyasi mühacir statusu almaq üçün saxta sənədlərin verilməsi ilə bağlı işləri araşdırırdı. Bu işlərdə Azərbaycan müxalifətinin nümayəndələri istintaqa cəlb olunsa da, heç kim məsuliyyətə cəlb edilməyib. Müxalifətçilər, onların hər hansı qanunsuz hərəkətlərdə  iştirakını təkzib ediblər,  “Turan*ın qeydi).

Yaqublu istintaqın iddialarını rədd edib və cinayət təqibini siyasi fəaliyyəti ilə əlaqələndirib.

“Biz təfərrüatları açıqlamırıq, çünki işdə müəyyən şəxslər var və ictimaiyyət gələcəkdə onlar haqqında məlumat alacaq. Növbəti günlərdə prosessual hərəkətlər davam etdiriləcək və biz istintaq sirrini açıqlamamaq şərti ilə bu barədə müəyyən məlumat verəcəyik. Amma əgər dövlət qurumları şəxsin təqsirsizlik prezumpsiyasını pozan məlumat yayarlarsa, bu halda biz onu təkzib etməyə məcbur olacağıq”, – deyə Layıc bildirib.

Qeyd edək ki, CM -nin 178.3.2 maddəsilə Yaqublunu 7 ildən 12 ilədək azadlıqdan məhrumetmə cəzası gözləyə bilər, 320.1 və 320.2 maddələri ilə iki ilədək müddətə azadlıqdan məhrum etmə nəzərdə tutulur.